काठमान्डौं, १९ फागुन ।   पर्साको कालिकामाई गाउँपालिका ४ मा रहेको नेपाल राष्ट्रिय माध्यमिक विद्यालयका १८ विद्यार्थी अचानक बेहोस भएका छन् । बेहोस् भएका १७ विद्यार्थी उपचारपछि घर फर्केका छन् भने एक जना अझै उपचार गराइरहेका छन् ।  कालिकामाईका अध्यक्ष बशिष्ट कुमारका अनुसार एक विद्यार्थीको अवस्था अलि बढी बिग्रेपछि वीरगंज लग्नुपरेको छ । बाँकी विद्यार्थीहरु  अस्पतालमा उपचारपछि घर फर्किसकेका छन् ।

विद्यार्थीहरु किन बेहोस भएको कुरा खुल्न सकेको छैन् । कतिपयले भूतप्रेतको प्रकोपले विद्यार्थीलाई बेहोस पारेको बताउँछन् ।  अध्यक्ष बशिष्टले विद्यार्थीहरु बेहोस भएको कारण थाहा नभएको बताउनु भयो । यसैबिच, बेहोस हुने समस्याले विद्यालयमा अध्ययनरत विद्यार्थीहरु त्रसित बनेका छन् । विद्यालयको पठन–पाठन आज सोमवार ठप्प रहेको थियो । गाउँपालिकाले थप दुई दिन विद्यालय बन्द गर्न निर्देशन दिएको छ ।